Thoes
Verschil

Mit heur klaaier dompeldeurnat van bragel, swait en bier kwam zai weerom van t boerenrockfestival. Dij band oet de Achterhouk beleefde zien swoanenzang en optredens waren n gekkenboudel,
Ien t duuster ree zai auto ien gerazie en trok doar heur goud oet. Laifke waarkte ien dainsten en zol al wel op t nust leggen. Zo’n aander leven haren zai ienainen: zai mog nog geern aan de flitter goan en as braandweerman hielp hai mor t laifst minsen oet heur ellèn.
Ien heur onderboksem schoot zai keuken ien, woar t complete braandweercörps de leste oefening deurnam mit n pilske derbie.

Ingeborg Nienhuis




Op fietse noar schoule

Mit de ziedwieltjes deraan kin klaainzeun Bram al n beetje fietsen.
t Is zowied: hai is vare en gaait mit pa en moeke richten schoule om veur t eerst kennis te moaken mit de juf. 'Hoi,' zegt juf, 'ik ben Ineke, hoe heet jij?'
'Bram!' En hai gaait geliek deur mit reveln: 'Ik ben op de fiets, wil je hem even zien?'
'Ja hoor, graag!'
'Oke! Moet je wel je jas aan doen, hoor!' t Is ja kold boeten.

Klaas van Zonneveld




Aanwiezens

Buren hebben nije hìnnen ien hok. Ollen legden nait meer en mozzen vot. Nije hìnnen leggen al. Schane genog nait ien nustkastje, mor haldaal achter ien t klaaine hokje, doar je bloots kroepend bie kommen kinnen. Zodounde zit buurman sums onder kippestront as hai aaier te pakken het. Mor nou is t kloar. Hai het twij plestieken kunstaaier ien nustje onder klep legd ien hoop dat hìnnen dij aanwiezens deurhebben. Plestieken aaier binnen nait van echt te onderschaaiden. En verdold … hìnnen hebben t deur en volgen aanwiezens op, mor ain vertikt t en blieft heur aai achterien hok leggen.

Nane van der Molen




Zwienebloasverknapbuzzerij

De road van nije gemainte Beer&Zeugetil vergoaderde over toukomst. t Luip oet op aigenbelaang. Linkse pertijman, bakker in gemainte, kloagde dat de veur rechts versleten dörpsslachter adverteerde mit ‘nijachtege’ reloades in eteloage.
'En wat zol dat din?' vruig börgmeester.
'Nou,' zee bakker, 't binnen gewoon zwienebloaskes, bedould as knapperij veur jongelu op oljoarsoavend.'
Reaksie van d’aandere roadslu was haalf om haalf. Börgmeester muik Corona-moelkörfke los en zee tegen bakker: 'Schier man, gain melkbuzzen, gain carbid, gain rötjesrötzooi en vuurpielen … dat liekt mie vaaileger as dat ze joen slagroomhulskes bruken as laagpetronen … haha, gelokkeg nij-joar.'

Gerhard P.J. Jansema




Knappertjes

'n Bos holt veur de deure as haarfst in t Slochterbos', zo nuimt Erwin de Vries t in zien laid Grunneger Wicht. Heur daip uutsneden haalsgat kon niks verbaargen. Ze zat n knappertje te eten, zo aine van Wieringa, dij zo krummelt. Haar ze der mor n haand onder holden … de krummels vuilen in heur Slochterbos. As je dij doar zitten loaten, zel dat vervast jeuken goan. Mor hou krieg je ze diskreet weer vot? Nait … ze zat schoamteloos in heur Slochterbos te vissen.
As ik nou n knappertje van Wieringa eet, denk ik weer aan dat wicht.

Bert Wijnholds




Iesboan

As k n gruine iesboan zai, dwoal k òf noar vrouger, dou je swinters nog scheuveln konden en meziek over t dörp klonk.
Soavends nuigde n lichte vlek in lucht mie. Boan was open. Op fiets over snijproeksel sjeesde k din nog noar boan. k Mos om haalf negen thoes wezen. Voak bleef hallozie stoan of dee k hom nait om. Ainmoal op t ies ging ales vanzulf. Swierend op meziek draaide k mien rondjes. En mor wachten … op dij poar handen van mien verkeren op rug.
Wat heb k wìnst noar n iesboan mit meziek en scheuvelwinters.

Kunny Luchtenberg