Thoes
Oproup: Grönneger resepten en eetverhoalen


k Heb al eerder n moal n oproup doan ien Kreuze veur t opsturen van olle resepten en eetverhoalen oet Grönnen veur n Grönnegs kookbouk mit olderwetse en nijmoodse resepten der ien. Dit projekt het wat laanger duurd as eerst bedocht, dus doarom nogmoals d'oproup: as ie nog olle resepten hebben van Grönneger resepten of verhoalen van vrouger over eten, slachten, aigen toen, stoetvìnters, genoat of zukswat, den zol ik t hail mooi vinden om dij te heuren. Joe kinnen t sturen noar niek_berendsen@hotmail.co.uk.

Even n aanzetje: hebben ie wel ais heurd van stoetkerels en swoan-ien-t-nust? Benoam op t Hoogelaand kregen kiender dij vrouger mit Sunnerkloas op n bord veur d’kaggel mit wat peperneutjederij. Mien opoe vertèlde mie dat man vrouger überhaupt nait zo veul witstoet kreeg, mainsttied ròggenbrood. Witstoet wer mainsttied allinneg sundoags kocht en den nait ien bakkerij, mor bakker kwam mit n körf bie deuren laanges.

Mit de kersttied ien de joaren ’50 en ’60 wör bie mien opoe aaltied oetpakt. Nait allinneg rolloade, mor ook gebroaden hoas en gaans, kibbesoep, sloatje (mien opoe nuimt dat 'kolle schuddel', mor volgens Google komt dat woord oet Limbörg), drij soorten puddings en den nog spul oet de weck. Zie haar d’haile keller volstoan, nait omdat t gezin zo groot was (zulf kwam ze oet n gezin van 10, mor zai haar enkeld twij dochters), mor omreden der wör rekenschop holden mit onverwachtse verziede dij ze touvalleg smörns ien kerk trevven zollen. t Wild wör schoten deur heur swoager dij n boerderij haar en mit n ploug manlu aan t joagen ging, mit n bult jenever, net as tiedens de slacht. Den kwammen ook vrunden en noabers helpen mit swien op ‘e ledder hangen, koien slachten en vraauwlu aan t wòrstmoaken.

Wie leven ien n tied dat de generoatsie van mien opoe (bienoa 92) aal klaainer wordt, dus wat mie aangaait is dit t moment om dit soort verhoalen op te taiken, zodat de jongere generoatsies der ook van leren kinnen. Dus as ie ook zuksoort verhoalen hebben, den ontvang ik dij geern.

Niek Berendsen