Thoes

Nineteen soixante-neuf? Ach man, dou toch gewoon … 1969.

Joa, loatve mor gewoon doun! Wie binnen gain Engelsen of Fransozen. Wie proaten Grunnegs, en zo is dat!
k Las in d'kraande, dat Niemeyers tabaksfebriek dicht gaait. As je smoken is dat nait mooi. As je tegen smoken binnen wel. Mor as stravve smoker liekt mie t nait verkeerd. Ie kennen de sigaretten en zuks meer wel aal in pries verhogen, mor dat helpt gain sodemieter! t Is n versloaven, hè! Ik las dat ons regeren der aal joar 2,8 miljard beter van wordt. En nog ais 500 miljoun aan aksiens beurt. Wat ducht joe! En mor roupen, dat je der mit ophollen mouten. Beetje schienhaaileg?
De fabrieken sloeten? Bin je nou hailendaal …? Nee, gain verlet om nog meer waarklozen noa dij mieterge Ko Rona. Mien idee? Verbaiden dat ze dij smerege versloavensstovven toudainen!
Ja, mien denken is in de loop der joaren oareg biestèld. Roem viefteg joar leden, in 1969 was k nog oareg begaisterd. Dou kregen wie as oetgever van t Veendammer Nijsblad n nuigen om bie t honderdviefteg joareg bestoan van Niemeyer aanwezeg te wezen. Prachteg om te zain dat dij wichter mit ain greep in de tebak persies 50 gram in t shagpuutje deden, n meroakel! n Prachteg bedrief mit hail veul persenail. Kon ja nait beter. k Mog zulf as aanwezege wat van heur handel oetzuiken. k Heb kozen veur n sigaret van n meter. Eerlieks woar. Mor hou haard k ook zoegen kon, ik kreeg der gain rook deur. Achternoa, haar dat n reden wezen kind om te stoppen? Meschain wel, mor doar was k dou nait mit bezeg en anno 2020 huift dat veur mie – noa 75 joar – ook nait meer.

Klaas van Zonneveld