Thoes
Wat Aans! & Burdy binnen Miljonair



As t aankomt op streams din binnen Wat Aans! en Burdy ondertied Miljonair. t Nummer Trilploat van Wat Aans! was t eerste Grunnegstoalige nummer mit meer as 1 miljoun streams op Spotify. In tied is dij koppositie overnomen deur Mit mien ogen dicht van Burdy. Om dit op n ludieke wieze te vieren is der nou de nije single: Wat Aans! & Burdy - Miljonair

n Soamenwaarken tussen Wat Aans! en Burdy ston al laanger op de planning. Doar was allinneg wel n goud idee voor neudeg. Dou Burdy zochzulf gekscherend Miljonair nuimde, dou vuil t kwartje. Dit is t themoa wat verbindt, mor dit is ook n thema woar je goud mit oetpakken kinnen. Dit zörgde oetendelk veur t ontstoan van t nummer Miljonair.

Zowel Wat Aans! as Burdy binnen al joaren groag gezaine acts tiedens verschaaiden evenemìnten. Miljonair’ is din ook nait allinneg geschikt veur de feesttìnt, mor zörgt derveur dat t op elk stee n feestje wordt. t Nummer is vanòf nou din ook te streamen via ale streamingdiensten en de videoclip is te zain op YouTube.

Wat Aans! & Burdy tiedens de clipopnoames van Miljonair

Bekiek Miljonair op YouTube: youtube




Twijde druk veur Groninger grammatica in kort bestek van Klaas Pieterman



In 1953 schreef K. ter Laan zien Proeve van en Groninger Spraakkunst. Sikkom zeuventeg joar loater is van domie Klaas Pieterman zien haand Groninger grammatica in kort bestek verschenen. Deur zien veurmoaleg affeer as leroar Nederlands aan t Alfa College, zien aarbaid aan de Grunneger Biebel en zien inzet as predikant in Grunneger dainsten, wer Pieterman aal nijsgiereger noar wat typisch Grunnegs is. In de coronatied het e zien aantaikens van joaren bie nkander brocht in n overzichtelk bouk. Hierin kommen hoast ale onderdailen van de Grunneger grammoatiek aan bod. Meschain nait t spannendste onderwaarp, mor Pieterman het pebaaierd t leesboar te moaken aan d'haand van veurbeelden oet de doagliekse praktiek. Nait ales wordt even oetgebraaid behandeld en meschain is t overzicht nait kompleet, mor Groninger grammatica in kort bestek kin n nutteg hulpmiddel wezen veur elkenain dij Grunnegs prat of schrift. Veur Groninger grammatica in kort bestek is nuver wat belangstellen. d'Eerste druk verscheen in t noajoar van 2021 en was al gaauw oetverkocht. Ondertied is de twijde druk oetbrocht.


Klaas Pieterman (Spiek,1944) schreef n aantal verhoalenbundels. Hai dee vertoalwaark mit Braiven aan Lucilius en mit t bouk Numeri in Biebel. Hai leverde biedroagen aan t kultureel tiedschrift Toal en Taiken en aan de Groninger Kerkbode. In 2004 verscheen van hom t Grunneger alliteroatsiewoordenbouk Gezondhaid en Groutnis.

Groninger grammatica in kort bestek Klaas Pieterman Uitgeverij Zolderman Twijde druk Ca. 200 blz. € 15,00 incl. BTW Te bestellen bie de schriever op: kg.pieterman@wxs.nl


Schrief in op n nij bouk van Anna de Vries-Maarhuis



Bie voldounde inschrievens verschient n nij bouk van Anna de Vries-Maarhuis: Joen proatboudels, mien schrieverij.

k goa Milnsom veurbie
mor dou t nait
k kom weerom
want Milnsom leeft in mie


Anna de Vries-Maarhuis

'In 1939 bin k geboren op Laskwerd. Noar schoul goan in Sibboeren. Schrieverij het aaid in mie zeten. k Braai nait mit n pèn, mor schrief der mit. Van aal ommaans had, zo gaait dat ja. In verpleging waarkt in Groot Loug. Loader traauwd mit Henk de Vries, mien grode laifde. Hai was boderieder en vervoarder.

Dit zel mien leste bouk weden, mor zeg noeit noeit.

Mit waarme groutnis: Anna'


Joen proatboudels, mien schrieverij kost €17,50 per stuk excl. verzendkosten. t Bouk kin ophoald worden bie de prezentoatsie in t Hippolytushoes. Wil je je t bouk geern ontvangen mit de post, bedroagen de verzendkosten € 4,50 per bouk of € 6,95 bie meer eksemploaren.
t Bouk verschient allinneg bie voldounde veurintaikens en zel din prezenteerd worden in de grote zoal van t Hippolytushoes in Milnsom. De prezentoatsiedoatum zel din nog bepoald worden.
Om joe ook ain of meer eksemploaren tou te stèllen van Joen proatboudels, mien schrieverij, kin je hieronder de flyer downloaden veur òfdrokken, invullen en opsturen.

flyer


Willem Tjebbe Oostenbrink krigt Duutse Borsla-pries veur Nederduutse toal en literoatuur


Foto: Teodozja Oostenbrink-Wieloch

Dichter Willem Tjebbe Oostenbrink oet Zuudhörn is mit de 25e Borslapries onderschaaiden.
Oostenbrink ontvangt de pries veur zien gedichtencyclus Begrip te boven veurbij verbeeldeng; in t Duuts: Jenseits des Verstehens. De cyclus bestaait oet n zestal in t Westerketiers schreven gedichten. De titel verwist noar de themoatiek van de gedichten. De dichter schildert mit veul waarmte prachtege beelden, volgens jurylid Jutta Oltmans. 'Hai moakt “lüttke Saoken” groot en stelt doarbie vroagen noar wat t leven de muite weerd moakt.'

t Is de twijde keer dat Oostenbrink de Borsla-pries ontvangt; d'eerste was in 2014. De Borsla-pries wordt toukend deur de Borsla-verainen veur nije Nederduutse toal en literoatuur. d'Oetlangen van de Borsla-pries zel ploatsvinden op 13 november in Bösel in de gemainte Cloppenburg ten zuudwesten van de stad Oldenburg.

De Borsla-pries wordt dit joar veur de vieventwintagste keer oetlangd. De Borsla-verainen veur Nederduutse toal en literoatuur in Bösel wil de toal en kultuur aan weerszieden van de grup aanpeerdjen. De pries is vernuimd noar de noam dij de stad Bösel in de middelaiwen druig.

Webstee Borsla-verainen: http://www.borsla.de/
Blog Willem Tjebbe Oostenbrink: blogspot


'Geef Nait Op' is de nijste single van Kriegel


Zotterdag 25 september is de nije single van de Grunnegstoalege band Kriegel in première goan. In Café Martini op Radio Noord is Geef Nait Op veur t eerst te heuren west. t Nummer is nou via ale bekende digitoale knoalen te beluustern, de videoclip is te bekieken op YouTube

Fietsen leren as klaain jonkje, dien fiets bruken om rad votkomen te kinnen wenneer dast in de perblemen zitst en vanzulf dien eerste vrundinnechie dij bie die achter op pakjesdroager zit. Opgruien in Stad mit vrouger in september en oktober de bekìnde geur van de baitencampagne.

Kriegel is n Grunnegstoalege band dij indierock moakt en vörmd wordt deur Hans Nooitgedagt, Erwin Blokzijl, Rients Faber en Jorgen Middel. De meziek kenmaarkt zok deur blues-invlouden, loate sixties gitaarsound, de karakteristieke stem van Rients, meerstemmege refraainen en experimentele oetstapkes deur de ritmesectie. De band moakt de meziek haldaal in aigen beheer in heur hoesstudio in Ten Boer, woardeur der voldounde roemte is veur hakkemak en nikkenak aan pebaaiersels. Ook t produceren wordt zulf doan. In 2019 het Kriegel de singles Bie Die en Engelien oetbrocht. In 2020 verschenen de singles De Kop Gek, Soamen Op t Strand en Dizze Kerst. In 2021 verscheen t Hogelaand.

Webstee Kriegel: kriegel-band.nl
Kriegel op Facebook: facebook.com
Kriegel op Instagram: instagram.com
Kriegel is ook op Spotify en Youtube te vinden


Nije belevenizzen van Wubbe en Jannoa in Tied veur n lach


Nico Torrenga prezenteert joe mit tröts zien twijde bundel mit 38 nije verhoalen over Wubbe en Jannoa Tillemoa. Noa ale ellèn kinnen wie altmoal wel wat humor bruken. t Is Tied veur n lach.

Mainsttied akkedaaiert t meroakels tussen Wubbe en Jannoa, mor sums kinnen zai nkander wel aanvlaigen. Benoam as ain van heur baaident zien handen ien n aandermans webenust stekt. len Tied veur n lach beleven zai weer van ales en zeilen joen lachspieren stief aan de bak mouten.

Tied veur n lach (paperback, 208 blz., pries € 15,- excl. verzenden) is verkriegboar in de boukhandel, bie Albert Heijn in n Daam, Winzum en Oethoezen of via info@nicotorrenga.nl.


Nico Torrenga is schriever van o.m. teneelstokken en körte verhoalen. Noast verschaaiden kluchten en bliedspeulen verschenen van hom de bundel Tied veur dieverdoatsie en de roman n Aarm verdrait.