Thoes

Ik kom der nait vandoan, ik woon der allinneg moar
(Uut de rieg: Grunneger in de Raandstad)

Huifst gain sosioal geogroaf, sosioal econoom en ook gain theoretische epidemioloog of wat veur waitenschopper din ook te wezen om vast te stellen dat der verschillen binnen tussen Westerlingen en Grunnegers. Ik woon al n poar joar in de Raandstad, en ains n Grunneger blift n Grunneger, moar in de òfgelopen joaren heb ik toch n oardeg beeld kregen van de verschillen.
Mensken hier in de Raandstad vroagen mie wel ais woarom dat Grunnegers zo ver weg wonen. Ik antwoord din dat dat net zo ver is as van Grunnen noar de Raandstad. Doar worden ze wel rusteger van. Men vindt zochzulf best wel wereldbörger, moar as ze noar Grunnen mouten, din hebben ze t gevoul dat ze n wereldraaize moaken. Hou Nederland der uutzugt buten de Raandstad, hebben ze ook nait recht goud op n riege. Lest mos k in Stad wezen veur mien waark. n Kollegoa in n Hoag bo mie aan dat k mit hom mitrieden kon, want hai mos toch noar Enschede, en hai kon mie dus wel even òfzetten en op de weeromraaize weer oppikken in Stad.
k Bin groots op t fait dat k uut Grunnen kom en ik voul nog aaltied n staarke band mit de pervinzie, net as de mainste Grunnegers, ook as ze aal n laange tied aargens aans wonen. In Zuud-Holland het nog nait d'helfte van d'inwoners n baand mit heur pervinzie. En dat schient veur n belangriek dail te kommen omdat Grunnegers vinden dat heur pervinzie n aigen kultuur het. Dat het din weer te moaken mit heur nuchtere kerakter. Mensken uut de Raandstad hebben nait zo’n aigen-kultuur-gevoul. t Zulfde geldt ook veur de pervinzievlage. De mainste Grunnegers herkennen heur aigen vlage. In de Raandstad is dat minder din 40%. En ik geef tou, bie mie thuus ligt de Grunneger vlage veur t ophangen, moar hou dij van Zuud-Holland der uutzugt, doar heb ik gain idee van.
Wie Grunnegers bin aaltied wel gevouleg veur n financiële touvaler. De Raandstad is ain van de mainst vergoorde omgevens van Europa. En toch wonen der enorm veul mensken boven op mekoar. Rondom Schiphol, Amsterdam en Rötterdam is t gezondhaidsrisico as gevolg van de onnure luchtkwaliteit wel drij keer groter din in Grunnen. Rookst ongemaarkt zo’n 5 tot 10 segretten per dag. Dus, Grunnegers dij t roken nait opgeven willen, geef ik as tip dat ze overwegen mouten om in Amsterdam of Rötterdam te goan wonen, dat scheelt die oardeg in de knippe (wat t roken betreft).
Deur d'internationoale bedrieven en de miljounen toeristen hebben de mensken in de Raandstad al snel d'indrok dat t leven hier internationoaler van kerakter is din in Stad. Moar as ik in de drij grode steden op stroade loop, in n winkel of n restaurant kom, din heur k allinneg moar Rötterdams, Hoags of Amsterdams. Terwiel dat k in Stad noast de streektoal veul meer Duuts of Engels heur, wat op mie toch n internationoalere indrok moakt. Tuurlek, Grunnegers binnen nuchter en ze zeggen gain woord te veul, dus din heurst ze ook minder. Terwiel mensken in de Raandstad veul minder beschaaiden binnen en veul meer proatjes hebben. Din heurst ze vanzulf ook veul meer.
CNN Travel het Stad op n lieste zet van de mooiste plekken in Europa om te bezuiken. Stad wordt aanbevolen as n beter alternatief veur Amsterdam. Der lopen hail veul nationoaliteiten rond en in veul krougen is Engels de voertoal. De toeristen rieden mekoar ondersteboven op heur huurfietsen. Vanòf t mement dat t Gronings Museum opend wuir, vuil de stad op, ook internationoal. Volgens CNN het Grunnen zoch ontwikkeld tot n wereldstad woar veul gebeurt. Tussentied is t pervinzioale karakter, dankzij de geïsoleerde ligging, beholden bleven. Wèl wil doar nou nait vandoan kommen.
Ik kom nait uut de Raandstad, ik woon der allinneg moar.
Joe heuren nog van mie. Moi.

Wim Blaauw