Thoes

n Vogel

As ik noar n vogel kiek
Vuil ik mie ontzettend riek
Hai huift nait dinken
Wat mout ik doun, drinken

Wat zel n aander van mie dinken
Wat gaait n aander aan mie schenken
Hai vlogt in de lucht
En huift nait op de vlucht

As ik noar hom kiek
Vuil ik mie ontzettend riek
Daarom nou daansend deur t leven
Want din kin t mie alles geven

Jil Wildenga



Balans

As meer nou ais n beetje minder was,
en minder even wat meer kon wezen;
Din ston alles beter wotterpas
en huif je te veul of te waaineg nait te vrezen. .


Niks waiten

'Olle, doarvan hebben joe gain benul,'
schamperde lèst n jonge knul.
Mor dou zien ket van fiets òf was,
kwam mien kennis hom goud van pas.


Vrijhaid

Vrijhaid bestaait veur ons mensen,
as wie erkennen t bestoan van grenzen.
Wordt dizze schaaiden deurbroken,
din is chaos en ellèn ontstoken.

Trijnko Pelgrim



Wotterval

De wotterstroom boant zuk
Ien roazernij n weg omdele -

De wotterwoas dij heur omgeft
Let allain òf en tou heur littaikens zain,

Hier en doar herken ik
De schim van n kirrel,

n Viskerman dij zukzulf
Terwiel dat e op zaalm viskerde

Aan t wotter verloor.

Bert Weggemans



Winschoot,
woar ik thoes kwam
as vekansie begon
en schooldeur in Stad tou ging.
Laive opa,
dat ponypeerdje heb k noeit van die kregen,
mor wel doezend kuskes
en veul meer den doezend laive woorden.
Winschoot,
ik heb doar nou gain thoes meer.
Mor aargens, hoog in hemel,
doar is denk wel n Nassaustroate,
woar ik zo achterom goan kin
en de laifste stem zegt:
'Hee, doar bistoe, mien wicht!?'

(Veur mien opa, Willem Klein)

Martha Hoffenkamp



Eerdbevensblues

(veur Anneke en Jaap)

k Bin baang
k Bin baang
k Bin baang
en dat al zo laang.
Vuil mie naargens meer thoes.
k Heb eerdbevensblues.

Blouddrok te hoog,
pillen veur moag,
trillens in t oog,
krieg hom nait meer omhoog,
stok in kroag,
k wil nait meer noar hoes,
k heb eerdbevensblues.

Roezie mit kinder
gramniedeg op vraauw,
t gaait aal moand minder.
k Snötter, k bin aaskegraauw.
Hail nacht lig k wakker
mit vraauw van bakker.
k Wil nait meer noar hoes.
k Heb eerdbevensblues.

Hail dag al oet t lood
van scheuren in t hoes.
k Wol net zo laif dood.
k Heb eerdbevensblues.

Staait weer n kontroleur
veur mien schaive deur,
het weer n beter plan.
wordt hai nog beter van.
k Bin baang van mien hoes.
k Heb eerdbevensblues.
t Hoes is ontwricht.
k Bin riep veur t gesticht.
Veur mien laifste wicht
sloa k deure dicht.
k Wol dat der n inde kwam
aan sjikaneren van NAM
en pazzipanten in Den Hoag.
Ligt mie n stain op moag:
woar vin k nog n hoes?
k Heb eerdbevensblues.

k Bin baang
k Bin baang
k Bin baang
en dat al zo laang.
Vuil mie naargens meer thoes,
k heb eerdbevensblues.

Rieks Holtkamp



Vattien feberwoarie (14 feb.) 1979
(Oerstrenge winterploage 1)

Snijdunen worden hoger, hoger
en hoger. Wind snidt vilaainer
en aal vilaainer deur alles hèn.

Vlaigmesienen mit soldoaten
binnen haard onderwegens
om ons aalmoal te verlözzen.

Minsen – bewoar joen kaalmte –
hold kop koul
en t verstaand deu.

Oproup veur vraauw Ritsemoa:
mins – weest nait zo’n knieperge knibbel-
kont – breng joen broenbrood

onmiddelk noar d’winkel weerom –
want in hail Noordbrouk
is gain plakkie stoet meer te kriegen.

Dou hier denken om:
ie binnen nait allain
op d’wereld – vraauw Ritsemoa.

Wie dailen nait allenneg in vreugde
mit mekoar mor veuraal as d’wereld
aldernoaste lelek noar ons loert.


Vattien feberwoarie (14 feb.) 1979
(Oerstrenge winterploage 2)

Mientje Mooimond mit n radiobericht
veur heur man Mannes:

Moi – laiverd –
bist van huus goan vanmörgen
mit n laange proeke hoar
om t bie kapper knippen te loaten.
Is gain deurkomen aan.

Mannes – hest t hoar van t doezen
nog nat op kop liggen.
Dou dien kappesjon òf en wacht
tot t hoar die van de vorst
zo haard worden is dast t makkelk
mit d’vingers òfbreken kinst.

Loop den verzichies deur de baargen snij
weer noar huus tou mit kappesjon op.
Den zit ik kloar
mit kovvie en kouke.
De groeten van dien Mientje.



Goud begun (end dezember 2019)
heb ik wat
veur die doan
zo klaain
k wait nait ains
meer wat
traktaaierst doe mie
type ain diabetikus
nait meer
op n aigenmoakt keunksmoal
schait mien suker
nait meer
as n vuurraket
omhoog noar moan of zun

laif en stil
supersnel van begrip
kieken dien ogen
mie onder dien knuvvels deur
aan mit zaacht ferwail

n goud begun

Henk Puister



Zo as t heurt

Noar 248 geboden mout je streven,
veur nou, en in rest van joen leven.
248 ledemoaten en bonken kent t lief,
dij holden joen liggoam staark, steveg en stief.

Under aal dizze geboden blief je stoan,
der zunder zel zo makkelk nait goan.
Ze geven joen leven inhold, doul en kleur,
veurkomen trammelaant en n bult gezeur.

365 doagen telt n joar
net zoveul as der verboden binnen.
365 dingen dij je nait maggen doun,
hol joe der aan, al was t oet fersoun.
Zo 613 ge- en verboden telt joen leven op eerde,
dit grode aantal het menskhaid vergoard.
As joe van joen noaste holden as van joezulf n keer,
din leef je tot eer van d'aander en van joen Heer!

Roel Sanders



n klokje hier
n smokje doar
lucht nog blier
aankomend veujoar

Nelleke van Vliet



Kwoaie

t Wit van ogen zit die veur kont
as ik smak of greem mit mien eten
ik achteròf schiet in ons hemmelde nust -
hou ik was en nooit meer wor, zelst nait vergeten.

Bist n goie vraauw, mor gun mie mien klokje en mien Van Nelle;
n beetje meer Amy Winehouse, laiverd, en net wat minder Libelle.

Pim De Noues



Schipperskind

vrouger dou was t aarmou troef
kropen veul mìnsen op n kloetje
zaten in n veul te klaaine roem
haren zulfs gain tied veur n doetje

ale doagen was t haard waarken
pa en moeke haren strìngen stief
zörgen om kinder zulfs de staarken
haren ìnkeld polten om t lief

waren gain sìnten, t kon ja nait aans
moeke laip in lien laangs t daip
kinder woonden bie ooms en taandes
gain mamme dij dicht bie ze slaip

d'ollen hebben t nou goud en braid
heur binnenschip wer groot
ze wonen op n stee vlak bie t daip
t schipperskind zunder boot

Kunny Luchtenberg



Luustervinken

Ik ving wat op vanmörn,
t ging over de preek,
d'ain zee tegen d'aander;
t was weer zo cliché,
dou zee d'aander tegen d'ain
bidstoe nog wel es den
veur onze dominee,
nou nee, allaang nait meer,
dou waren ze stil
en ben ik votvlogen,
ik zag nog net
dij doef doar boven.
Ien de grui


Ien de grui

Wat is n kiem
vroug ze
tussen
twij happen ien
ze las n krantenkop
en docht
dat er ain
ien smoord was.

Coby Poelman-Duisterwinkel



Noamen

Terwiel
Ciara en Dennis
heur noamen
hoog van de
toren bloazen
schoamt
t verwaaide
snijklokje
zuk
veur de snij
in heur noam
dij gain noam
hebben mag.

Henk de Weerd