Thoes
Boogschutter en laiw
(Noar n foabel Aesopus)

n Haile goie boogschutter ging baargen ien op zuik noar buit, mor aal daaier gingen der vandeur zo gaauw hai dichtbie kwam. Bloots laiw wol hom weerstoan. Boogschutter schoot vot n piel oet zien boog op laiw òf en raip: ‘k Stuur die mien bosschop zodatstoe waits wat of ter gebeurd as k zulf zulf mit die ien slag goa.’
Deur piel verwonde laiw ging der votdoadelk schietensbenaauwd vandeur.
Vos haar van n òfstaand toukeken en zain wat of ter gebeurde en raip tegen laiw dat dij wat moudeger weden mos en der nait bie eerste aanval oetrieten mos.
Mor laiw raip weerom: ’Kin wel zo weden, vos, mor as dij kerel al zo’n vrezelke bosschopper stuurt, hou kin k din aanval van kerel zulf weerstoan? Dat red k nait.’

Pas op veur lu dij joe op òfstand aanvalen kinnen.



Hond en hoas
(noar n foabel van Aesopus)




Hond dij n hoas tou t leger oet joug, ging achter daaier aan. Dou hai hoas ienhoald haar, beet hai hoas zo verniend dat hai hoas sikkom dood beet. Mor hoas ontkwam en ging der weer van deur.
Dou hond hoas veur twijde moal ienhoald haar, beet hai nait tou, mor was t net of hai mit hoas speulen wol. t Leek ter wel noar of hond docht dat hoas n aandere hond was en zien kammeroadje.
Dou raip hoas tegen hond: ’k Wol wel dastoe die gedroagen zols zo as ain verwachten mag en dastoe dien woare oard dus teuns. Astoe mien kammeroad bis, woarom bietstoe mie din zo haard? Astoe mien vijand bis woarom dugs din zo vrundelk tegen mie?’

Gain ain kin joen kammeroad wezen as ie nait waiten of ie hom vertraauwen kinnen of nait.

Nane van der Molen